“Diona e Dheut”

Ekspozita “Diona e Dheut” në “GOCAT” nga Mira Kuçuku, Llambrini Dëna Bojaxhiu, Laura Sllamniku Kryeziu, Blerta Surroi dhe Gresa Kurti

Ekspozita “Diona e Dheut” në galerinë “GOCAT” ishte më shumë sesa një prezantim veprash në qeramikë. Ishte një përjetim artistik dhe shpirtëror që të kthente tek origjina, tek toka dhe tek lidhja e hershme e njeriut me krijimin.

Veprat komunikonin me njëra-tjetrën përmes formave organike, strukturave të dheut dhe simbolikës femërore që buronte nga figura mitologjike e Dionës.

Një rol të veçantë në këtë ekspozitë kishte kuratorja Suzana Varvarica Kuka, e cila kishte ndërtuar të gjithë konceptin kuratorial si një udhëtim të brendshëm mes mitit, tokës dhe energjisë krijuese të gruas. 

Çdo vepër dukej sikur kishte kaluar nëpër një proces transformimi, njësoj si njeriu që kalon nëpër kohë, dhimbje, kujtime dhe rilindje.“Diona e Dheut” më la ndjesinë se arti bashkëkohor shqiptar mund të bëhet shumë i fuqishëm kur lidhet me rrënjët e veta kulturore dhe mitologjike.